Ojú ọ̀run ṣú biri biri, atẹ́gùn nlá mi ilẹ̀ mìtìtì
Ará ọjà’n palẹ̀ mọ́, ẹran oko’n wá ibòji kiri
Ṣé òjò yí ó rọ̀ bí, tàbí òjò kò ní rọ̀?
Òjò kọ́ o, ẹ̀yin ará ilé
Omi ẹkún ojú mi ni ó’n lérí làti dà wálẹ̀
Ìpọ́njú ò kí’n mú oúnjẹ lọ lẹ́nu
Ìbànújẹ́ ò mọ adùn, bẹ́ẹ̀ sì ni kò mọ jẹ́ kájọ jó
Ẹni ọbá gbà ní ìyàwó, kò sí ẹni tí yí ó ki pẹ̀lẹ́
Ẹni ikú ṣe ìrẹ́jẹ fún, ṣé yí ó wa yọ àdá sí Elédùmarè ni?
Omi ẹkún ojú mi l’ón bẹ̀bẹ̀ fún òmìnira ò
Ní ọjọ́ kíní ànọ́, gbogbo ayé báwa yọ́ wípé ati di ọlọ́lá
Ọlá náà dé ní tòótọ́, sùgbọ́n àpò alápò ló bọ́sí
Epo’n dàmọ́ omi òkun, àìsàn’n dàmú gbogbo ará ìlú
Ẹja inú omi tidi màjèlé, ìyáa tèmi nìkan kọ́ ló jẹ níbẹ̀ o
Omi ẹkún ojú gbogbo wa ni ò’n fẹ́ bíbí báyi
Ilé ayé ti wà kí ató wá
Àmọ́ owó àti ọrọ̀ kò jẹ́ kí alágbára náání ilẹ̀ tí ó’n tẹ̀
Ojú ọ̀run ṣú biri biri, atẹ́gùn nlá mi ilẹ̀ mìtìtì
Àṣé bí ìbànújẹ́ ṣe gba ọkàn ènìyàn, ni óṣe’n gba ọkàn ayé náà
Ni ìgbà tí ìjì náà bádé, yí ó kó ilé, ọ̀nà, àti gbogbo wa pẹ̀lú omijé wàrà wàrà
Leah Ojúọlápé Adéyẹyè
Leah Ojúọlápé Adéyẹyè is a story enthusiast who enjoys telling them to little children, especially her grandkids, with whom she often lay side by side on raffia or rubber mats at night, staring into the sky and counting stars, telling stories about what went on in each one. She was a finalist for Faber Children’s FAB Prize in 2023.
